Monday, October 26, 2009

Ui Note Zawrh Lai

Lo neitu pakhat hian ui note hralh tur a nei nei nual a. A in kawtah chuan ui note tha tak tak hralh tur a neih thuziak chu langsar takin a tar a thluah a. Chutia a tar mek lai chuan mipa naupang pakhat hi a bul lawkah chuan a lo ding reng a. Chu naupang chuan, "Ka pu, i ui note pakhat chu ka lo lei nghal ang e," a ti a. Lo neitu chuan a bianga thlantui luang hruk pah chuan, "Teh reng mai, ka ui pui leh ka uipa-te hi an tha bawk a, an note-te hian an chhun teh mai ania, an man pawh ka ti to deuh a. Mahse, i inchhir lo viau ang. Lo kal rawh," ti a tawng bawrh bawrh chungin chu naupang te bulah chuan a ding a.

Naupang chuan a pawisa neih chhut nauh nauh pahin a ipte a zen a, pawisa nawi te te a phawrh a, Cheng 30 chiah chiah a lo ni a. "Cheng 30 chiah hi ka nei si a, pakhat leina a daih ang em?" tiin a zawt leh a. Lo neitu chuan, "Daih chiah e," ti a chhangin chang a han tum raih a, "Dolly, dolly!" tiin a au a.

Ui dahna in atang chuan a pui 'dolly' chu a lo tlanchhuak nghal a, a hnungah chuan a note pali chuan an rawn um biang biang a. Hmul buk tha tak, thau chum buang mai an nih avangin a neitupa pawh chuan chhuang takin a chawm that zia leh an la that turzia chu a sawi bawrh bawrh a. Mipa naupang chuan in hungna pal bawh chungin hlim taka nui var var chungin a lo thlir reng a, a hlimzia chu a mit mengah chuan a hriat theih a ni.

Uipui leh a note-te chuan an bul an lo thleng a, an infiam a, an mei vai chungin an inbawh a, an inum vel a, a neitupa chuan ui note hrisel tak an nih thu sawiin a fak zui mawlh mawlh a. Chutihlai chuan mipa naupang chuan ui dahna in lam chu ngun takin a lo thlir a, a chhungah chuan thil che zauh zauh hi a hmu a. Chutah ui note dang pakhat a lo lang a, han en mai pawhin a unaute aiin a te zawk tih a hmuh theih nghal a. A lo chhuak chiah chu a kawng awih deuh hlekah chuan a tawlh thla zui nghal a, thei leh thei loin a inham tang hram a. A unaute lam pan chuan zei lo em emin a rawn kal ve laih laih a. A tlan sawi tlei tlei a, a theihtawp a chhuah tih a hriat reng mai a.

Naupang chuan pal bawh chungin mit la lek loin a lo en reng a. Chu ui note chenbeh tak mai chu kawk chungin, "Saw saw ka duh e," a ti ta a. Lo neitu chuan makti taka en pahin naupang hnenah chuan, "Ka fapa, saw saw chu i duh lo ang. A pian a fuh lo a, engtikah mah a tlan ve thei dawn lo a, heng ui note dangte ang hian i infiampui thei dawn miah lo asin," tiin a chhang a.

Chu thu a sawi zawh chuan naupang chu pal atang chuan a han hnungtawlh hret a, a kekawr chu a chawi chhing nghal a. Ke a lo nei lo a, a ke pahnih chu thira siam a lo ni a, a bika siam pheikhawk a bun nghe nghe a. Lo neitu hmel en chung chuan, "Ka pu, hei i hmuh ang hian kei pawh hi engtikah mah mi pangngai angin ka tlan thei dawn bik lo a. Saw uite sawn a harsatna hriatthiampuitu a mamawh a, kei hian ka hriatthiampui berin ka ring," a ti ta a.

He khawvelah hian hriatthiampui mamawh em em harsatna tam tak an awm asin.

(PUPPPIES FOR SALE tih lehlin a ni - Lalthlamuana Ralte)

Related Posts :



No comments:

Post a Comment