Monday, February 22, 2010

Basil-a Kiangah Darkar Chanve

¢ Joseph Lalrintluanga

Mizo naupang Basil chu
A pa hi tennis khelmi a ni; naupang tê a nih laiin Aizawl tennis court-a a pa Pu Herman-a inkhel tur chu a zui ve a, hunawl remchangah tennis ball a lo vaw ve thin. Chutih laia a pa tennis khelhpuite chuan he mipa naupang hi engtik ni-ah emaw Babolat, Head leh Wilson te'n an la sponsor ang tih an ring pha lo. Novak Djokovic te training tawh thinna hmunah phei chuan a la kal ve ngai ang tihngaihna reng an hre hek lo!


Zarkawt Babutlanga cheng Pu Herman Sangthankhuma leh Pi Mary S. Ralte te fapa Basil L. Khuma, kum 13-mi hian India tennis khawvelah hian hriat a hlawh tawh. Hriat a hlawh nachhan chu tennis khelh a thiam êm vang a ni. Kum 13 lek la ni mah se kum 16 mi vel ni awm takin a sâng thlarh a, a pian hi a dik a ni. Infiamna zinga thiam bel har ber pawl, tennis ball a vuak dan phei chu dik tak a ni. Hei hi lo chhinchhiah teh, Basil vang hian Zofate'n hriat kan la hlawh lehzual dawn.

Aizawl-ah Basil
Kar kal ta Nilaini tlai khan Basil-a inkhel hmu tur hian Tennis Court lamah phur takin ka phek phei a. Ka va thlen chuan Mizoram Number One, Ngopa tlangval Lalrinawma nen practice match an lo khel mek a. Court kiangah chuan Mizoram Tennis Association general secretary Pu Lalfakzuala Hmar leh midangte chuan an lo thlir mek a. An khel chu a hmuhnawmin an class a sang khawp mai. Basil hi a serve a tha em em mai a, winner a hit that theih bakah drop shot te phei chu tawk nalh thei tak a ni. Kum 2 vel kal ta atanga Mizoram men’s singles champion ni deuh reng Rinawma pawh hian Basil a winner hit hi a pui theih em avangin a thlir liam a, kut bengin a lawmpui tawp zel a ni. An inkhelh zawh hian Aizawl Tennis Club office-ah Basil chu kan kâwm ta a.

Delhi-ah Basil a chhuk
Tennis a tui tak, tennis chênchilh chhungkua atanga lo chawrchhuak Basil hi 2005 khan Delhi-ah tennis leh lehkha zir turin a chhuk thla a, kum 9 vel lek la ni mah se local tournament hrang hrangah a tel ve thin a, kum 2 chhung zet chu lawmman engmah la lovin a tei kual ve a, mahse kum 2007 a lo inherchhuah meuh chuan Under 12 leh Under 14 tournament-ah lawmman a la ve ta.

2008 leh 2009-ah te phei chuan National Series leh Super Series ah te khel ve tawhin India ram khawpui hrang hrangah chak ber nihna a hauh ta. Ranking-ah pawh pakhatna leh pahnihna tihvel chu a chêttlatna a ni. Kumhlui mai pawh khan Bangalore-a National School Games-ah an school, Hans Raj hminga khelin gold medal a la leh ta a, hei vang hian Delhi sorkar chuan cheng nuai khat chuang pek a tum nghe nghe.

Munich khawpuiah Basil
National Series leh Super Series ah te a chetthat êm avangin Sports Authority of India (SAI) chuan nikum tawp lam khan Basil hi tennis-a India ram la tihmingtha thei tur a ni tih hriain Basil-a tana thil chhinchhiahtlak tak mai a tihsak ta. Tunlai ATP tour a player lar ber pawl, mipa ranking-a top 5-a lang pha deuh reng leh Grand Slam title chang tawh Novak Djokovic te, hmeichhe player lar lutuk Serbian nula Jelena Jankovic leh mipa player lar tak Ernest Gulbis teho lo inzir tawhna, Germany khawpui lian Munich-a Niki Pilic Tennis Academy-a thla 2 chhung training zu nei turin a tir chhuak ta nalh mai.

India ram atangin amah chauh he remchanna hi pek a ni a, chu Academy chuan a thiamna an lo tuaihriam sak ta. Inrintawkna a neih phah a, a serve a that phah a, ho taka ball hlah mai mai loh dan a zir a, winner vuak dan a zu zir nasa bawk. India rama a zirna leh Niki Pilic Academy danglamna kan zawt a. Ani chuan, “India coach te ai chuan an taima zawk,” a ti thlawt. A zu hlawkpuina langsar tak chu a Serve-ah a ni tih sawiin Coach te chuan ball hlah har (consistency) an zirtir uluk hle tih a sawi bawk. An thil kalpui dan engkim mai chu an beingawrh (intense) hle tih a sawi a ni.

Germany-ah hian zing dar 7-ah thovin breakfast an nei a, dar 7:30-ah warm up an bei tan a, tichuan dar 8 vel atangin an khel tan ta thin a, darkar 2 chhung vel an khel thin a ni.

Delhi lamah bawk
Hans Raj-a pawl sarih zir mek, Basil hi tennis a thiam em avangin Mahesh Bhupati tennis academy, Delhi-ah 2007 atang khan a thlawna coaching pek a ni a, hetiang tennis zirna thaa free coaching dawng thei tur khawp hi chuan thiam fe a ngai tih kan hriat a tha ang. Chutiang duhsakna dawng thei khawp chuan Mizo naupang hian a khelthiam a ni.

An school pawhin engkim a free-in a tihsak vek a, an hotute chuan an school-ah hian a kal lovang tih an hlau ngawih ngawih a ang ber. Chutiang bawkin Academy pawh hian a thiamna an hmu chiang a, an hnenah hian a inzir lovang tih an hlau ngawih ngawih a ang hle. Tuna amah zirtir thintu hi India rawlthar zinga tennis thiam lar ber ni mek, Yuki Bhambri-a coach Aditya Sachdeva a ni. Tlem lai khan tennis racket leh tennis bungraw chi hrang hrang siamtu company lar Wilson chuan Basil hi kum 5 chhung atan contract an ziahpui a, hemi chhung hian an product chu a duh duh a hman an phalsak a, an product hi a hmang duh lovang tih an hlau hle ni âwm tak a ni.

Basila hmabak
Basil hi tun thla ni 20 thleng Aizawl-ah a châm dawn a, March ni 20 hian Hong Kong bul lawk - Sheng Sen, China-a khelh tur Asian Junior Championship ah India aiawhin a chhuak leh dawn. India atangin mipa 3 leh hmeichhe 3 an fehchhuak dawn a ni.

A u Joseph-a pawh
Basil-a u Joseph Z. Khuma hi tlangval tumruh tak mai a ni a, Delhi-ah tennis coaching pein ei a zawng mek a, Chanakyapuri-a Railway Club chu thuthmunah neiin a hnena tennis zir tum naupang enkawl sen loh khawp an lo kal thin a, screening a lo neih hnuah zirtir tak tak tlak nia a ngaihte chauh a enkawl zui a, thla khata a sum lakluh zat chu a theuneu tawh lo khawp mai! Car nalh tak pawh a lei var var tawh.

Pi Mary
Basil-a nu Pi Mary hi tennis a tui tak mai a ni a, a fapa hi Delhi-ah awmpuiin tournament a khelhna apiangah a zui thin a, a châng chuan hmun hla tak taka kal a ngai a, a zui zel a, a chang chuan amah chauh chu a fapa lo tantu a ni. Mizo chu kan hmel a lo danglam deuh bawk a, duhsak loh zawka tan chang a awm ve thin, chutiang hunah chuan, “Ka tawngtai tawp zel,” a ti.

Hmanni National School Games, Bangalore a Tennis final an khelh tum pawh khan Vai ni ve lo tana huatthlala tak takin Basil hi an lo au nawmnah a, mahse Basil hi a zam lo ni awm tak a ni, gold medal latu chu tu nge? Mizo naupang Basil L. Khuma a ni. Pi Mary hian a fapa hi a duat a, a ei leh in tur buatsaih sak kawngah pawh a fimkhur hle…

Kum 13 mi lek Basil-a hian chanchin ngaihnawm tak tak a ngah tawh khawp mai. Hip hop, R&B leh slow rock te ngaithla uar ve hle a, mahse hengte hian a nun a kaihruai sual ve lo a, a mengrei ve ngai lo a, a tho har ngai hek lo. A invawng a, a beingawrh a, a ke chheh a uluk a, a hmaa ding apiang hmachhawn turin a inzir chho mek a ni. Mizoram Tennis chinchang hre tak pakhat chuan he mipa naupang kum 13 mi hi Mizoram-ah chuan Men’s singles champion a ni thei tawh hial ang, a ti.

Related Posts :



No comments:

Post a Comment